Taniqli shoir Bahodir Sodiqning "Ko'zlardagi dunyo" kitobi taqdimoti o'tkazildi

Ayni paytda Urganch davlat universitetida O'zbek filologiyasi fakulteti tashabbusi bilan marhum shoir, taniqli munaqqid, adabiyotshunos olim Bahodir Sodiqning “Ko'zlardagi dunyo” kitobi taqdimoti va adabiy anjuman oʻtkazilmoqda.  

Anjumanda Respublikamizning taniqli ijodkorlari, yozuvchi va jurnalistlari, O'zbekiston Yozuvchilar uyushmasi a'zolari, xususan, O'zbekiston xalq shoiri, "Ofarin" mukofoti sohibi Usmon Azim, O'zbekistonda xizmat ko'rsatgan yoshlar murabbiysi Mirzo Kenjabek, shuningdek, O'zbekiston Yozuvchilar uyushmasi Xorazm viloyati boʼlinmasi rahbari, shoira Gavhar Ibadullayeva va viloyatimizning taniqli yozuvchi va shoirlari, O'zbek filologiyasi fakulteti professor-oʻqituvchilari va talabalari ishtirok etmoqda.  

Dastlab O'zbek filologiyasi fakulteti dekani, professor D.Gʻayipov adabiy anjumanga tashrif buyurgan mehmonlar, ularning ijodiy faoliyati, o'zbek adabiyoti rivojida Bahodir Sodiqning o'rni va "Ko'zlardagi dunyo" kitobining mazmun-mohiyati yuzasidan ma'lumot berib, tadbirning birinchi qismini boshlab berdi.

Anjumanning asosiy qismida O'zbekiston xalq shoiri, "Ofarin" mukofoti sohibi Usmon Azim, O'zbekistonda xizmat ko'rsatgan yoshlar murabbiysi Mirzo Kenjabek va boshqa ijodkorlar tomonidan shoir Bahodir Sodiq xotirlanib, uning qisqa muddatli ammo oʼzbek adabiyoti olamida oʼziga xos oʼringa ega adabiy ijodi haqida, "Ko'zlardagi dunyo" kitobining mohiyati borasida maʼruzalar tinglandi.

Anjumanning birinchi qismida O'zbekiston Yozuvchilar uyushmasi Xorazm viloyati boʼlinmasi rahbari, shoira Gavhar Ibadullayeva va viloyatimizning qator taniqli yozuvchi va shoirlari soʻzga chiqib, adabiyotshunos olim Bahodir Sodiqning “Ko'zlardagi dunyo” kitobi haqida oʻz fikr-mulohazalarini bayon etdilar.

O'zbekistonda xizmat ko'rsatgan yoshlar murabbiysi Mirzo Kenjabek  oʻzining “Hayot sadolari” va “Nomus janggohi” nomli kitoblarini Oʻzbeki filologiyasi fakulteti kutubxonasiga taqdim etdi. Anjuman kitob taqdimotidan so'ng,  O'zbek filologiyasi fakulteti talabalari tomonidan tayyorlangan badiiy chiqishlar bilan davom etdi. Shoir Bahodir Sodiq hayoti aks etgan qisqa metrajli lavha, milliy raqs va kuy-qo'shiqlar, talaba-qizlar tomonidan o'qilgan Bahodir Sodiq hamda anjumanga tashrif buyurgan ustoz ijodkorlar qalamiga mansub she'rlar tomoshabinlarda xush kayfiyat uygʻotdi.