Урганч давлат университети ахборот хизмати фаолияти ҳақида

МАЪЛУМОТ

Ўзбекистон Республикаси Президентининг 2018 йил 5 июндаги “Олий таълим муассасаларида таълим сифатини ошириш ва уларнинг мамлакатда оширилаётган кенг қамровли ислоҳотларда фаол иштирокини таъминлаш бўйича қўшимча чора-тадбирлар тўғрисида”ги ПҚ-3775-сонли қарори ҳамда  Олий ва ўрта махсус таълим вазирлигининг 2018 йил 17 июлдаги 625-сонли буйруғи ижросини таъминлаш мақсадида  Урганч давлат университетида Ахборот хизмати фаолияти тизимли йўлга қўйилган. Ахборот хизмати раҳбари университет матбуот котиби, ахборот сиёсати масалалари бўйича ректор маслаҳатчиси мақомига эга.

2020 йил 6 июль санасидан Урганч давлат университети Ахборот хизмати раҳбари сифатида Аҳмедова Марҳабо Фарҳод қизи фаолият олиб бормоқда.

Университетда ахборот хизмати фаолиятини самарали ташкил этиш мақсадида замонавий моддий-техника воситалари, шу жумладан, фото ва видео ёзиб олиш воситалари, компьютер ва планшет, юқори тезликдаги интернетдан фойдаланиш имконияти ва бошқа зарур дастурий маҳсулотлар билан таъминланган.

Урганч давлат университетининг  таълим жараёни, энг сўнгги янгиликлари,  илмий ва маънавий-маърифий ишлар, талабалар ҳаёти, халқаро ҳамкорлик алоқалари ҳамда танқидий-таҳлилий материаллар университетнинг  urdu.uz  расмий  веб сайтини  зарур маълумотлар, янгиликлар билан уч тилда (ўзбек, инглиз, рус тилларида) ҳамда  Матбуот хизматининг  фейсбук, телеграм, инстаграм, ютуб саҳифалари орқали тезкорлик билан ёритилиб бормоқда.

Ахборот хизмати томонидан университет ва оммавий ахборот воситалари, блогерлар ҳамкорлигини самарали йўлга қўйиш орқали олийгоҳ имиджини кенг жамоатчиликка намойиш қилиш, университетда амалга оширилаётган ишлардан аҳолини хабардор қилиш ҳамда муассаса ҳақида холис тасаввур уйғотиш мақсадида  ҳар ой мунтазам равишда матбуот анжумани, медиа-тур, брифинг, очиқ мулоқот каби кўплаб медиа тадбирлар ташкил этилади.

Бундан ташқари, “Ўзбекистон24”, “Ўзбекистон”, “Маданият ва маърифат”, “Ёшлар” сингари марказий, “Хоразм МТРК”,  “С-Иқбол”, “8 тв” каби маҳаллий теле ва радиоканаллар билан ҳамкорлик йўлга қўйилган бўлиб, университет фаолиати мунтазам ёритиб борилади.  Шунингдек, “Халқ сўзи”, “Янги Ўзбекистон”, “Народное слова”, “Правда востока”, “Ҳуррият”, “Хоразм ҳақиқати”, “Хорезмская правда” каби республика ва вилоят миқёсида чиқадиган газета ва журналларда университет фаолияти илмий-оммабоп мақолалар орқали  мунтазам равишда ёритилиб борилмоқда.

Бундан ташқари, университет матбуот хизмати доимий равишда  Олий таълим, фан ва инновациялар вазирлигининг Ахборот хизмати билан ҳамкорликда иш олиб боради. Жумладан, Олий таълим, фан ва инновациялар вазирлиги ахборот хизмати билан ҳамкорликда миллий ОАВ ва электрон нашрларда ёритиш учун хабарнома, шарҳлар ва ахборот-таҳлилий материаллар доимий равишда тайёрланиб келинмоқда.

Шунингдек, Олий таълим, фан ва инновациялар вазирлиги ахборот хизмати раҳбарлигида Ўзбекистон бўйлаб олий таълим муассасаларининг матбуот котиблари билан ўзаро фикр алмашиб, аниқ ва тезкорликни таъминлаш мақсадида ижтимоий интернет тармоқлари орқали мулоқот қилиш учун ижтимоий гуруҳда ҳам ўз фаоллигини намоён қилиб келмоқда.

Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги Хоразм вилояти бошқармаси бошлиғи Д.З.Бекчанова раҳбарлигида таълим муассасалари ва давлат идора ташкилотларининг матбуот котиблари иштирокида ташкил этилган йиғилишлар, семинарларда УрДУ матбуот котиби М.Аҳмедова  фаол иштирок этиб келмоқда.

Урганч давлат университети Кузатув кенгашининг 2023 йил 24 августдаги 3-сон йиғилиши  қарорига биноан, университет матбуот котиби лавозими тугатилиб, унинг ўрнига "Ахборот хизмати" бўлими ( 4 штат бирлик) ташкил этилди. Ҳозирда ушбу бўлимда бўлим бошлиғи М.Аҳмедова билан биргаликда бош мутахассис (ёрдамчи), етакчи мутахассис (монтажчи) ҳамда иш юритувчи (оператор) лавозимларида жами 4 нафар ходим фаолият олиб бормоқда.

Бўлим Урганч давлат университетининг таркибий бўлинмаси бўлиб, университет фаолияти ҳақида оммавий ахборот воситалари, ижтимоий тармоқлар ва бошқа ахборот ресурслари орқали халққа мунтазам, тўлиқ ва тезкор тарзда ахборот бериб бориш ишларини ташкил этишни амалга оширади.

Бўлим ўзига юклатилган вазифа ва функцияларни бажаришда  ўз фаолияти соҳасига оид таклифлар билан университет Кенгашига ва университет ректорига мурожаат қилиш, таркибий бўлинмалардан зарур маълумот ва ҳужжатларни белгиланган тартибда олиш, ўз фаолиятига тааллуқли масалалар юзасидан мажлислар ва йиғилишлар ўтказиш ҳуқуқларига эга.

Бўлим низоми