1-OKTABR - "O'QITUVCHI VA MURABBIYLAR KUNI" MUNOSABATI BILAN URGANCH DAVLAT UNIVERSITETI REKTORINING BAYRAM TABRIGI

Assalomu alaykum, aziz o‘qituvchi va murabbiylar!

Mamlakatimizda “1-oktabr - O‘qituvchi va murabbiylar kuni” deb belgilangan. O‘qituvchilik kasbini e’zozlash, mehnatini qadrlash va munosib rag‘batlantirish ta’lim sohasidagi islohotlarning muhim yo‘nalishiga aylangan. Yosh avlodni barkamol inson etib kamolga yetkazishga alohida e’tibor qaratish xalqimizga xos ezgu fazilatlardan biridir.

Har bir insonning komil shaxs bo‘lib vovaga yetishida, yetuk kasb egasi bo‘lib jamiyatda o‘z o‘rnini topishida ustoz – muallimlarning o'rni juda muhim.

Fidoyi, zahmatkash o‘qituvchilar talaba-yoshlarga bilim berish barobarida, ular qalbiga insonga xos eng go‘zal ezgu hislatlarni, mehr - oqibat va odamiylik tuyg‘ularini singdirib boradi. Turli yo‘nalishlarda o‘z iqtidori, mahorati va bilim salohiyati bilan yuqori natijalarga erishib kelayotgan o‘g‘il-qizlarimizning muvaffaqiyatlari zamirida, avvalo, Siz, aziz ustozlarning  mehnatlari mujassam. Ana shunday fidoiy ustozlarimizni bugun qancha e’zozlasak kamlik qiladi.

Darhaqiqat, biz yosh avlodni ma’nan yetuk, tafakkur olami keng va bilimli insonlar etib tarbiyalayotgan o‘qituvchi – murabbiylar timsolida ertangi kunimizning porloq kelajagini, Vatanimiz taraqqiyoti uchun sidqidildan xizmat qiluvchi o‘g‘il - qizlarimiz baxtini ko‘ramiz. Yuragi g‘ayrat-shijoatga to‘la, yoshlar tarbiyasi yo‘lidagi mas’uliyatli vazifani o‘z zimmalariga olgan Siz, aziz ustozlarga minnatdorchilik bildiramiz.

Qalbi ezguliklarga yo‘g‘rilgan aziz ustozlar, mehridaryo professor-o‘qituvchilar!

Barchangizni “1-oktabr –O‘qituvchi va murabbiylar kuni” bilan chin qalbimdan tabriklayman! Sizning yuksak mas’uliyatli, mashaqqatli va sharafli mehnatingizda zafarlar, oilaviy hayotingizda esa baxt, omad yor bo‘lishini tilab qolaman.

Baxrom Abdullayev

Urganch davlat universiteti rektori, professor